डोगरी संस्था जम्मू पासेआ कल्ल ‘इ’क्कीमी सदी दा डोगरी गद्य साहित्य: स्थिति ते गुणवत्ता’ विशे इक रोजा सैमीनार दा आयोजन डोगरी भवन, कर्ण नगर च कीता गेआ। सैमीनार दे उद्घाटन सत्र दी प्रधानता जम्मू-कश्मीर अकादमी ऑफ़ आर्ट, कल्चर ऐंड लैंग्वेजेज, जम्मू, दे सैक्रेटरी डॉ. अज़ीज़ हाजिनी होरें कीती ते मुक्ख परौह्ने, साहित्य अकादमी, नमीं दिल्ली च डोगरी परामर्श बोर्ड दे कन्वीनर, श्री दर्शन दर्शी होर हे।
उद्घाटन सत्र दे अलावा पत्र-वाचन सत्र होआ जिस च त्रै पेपर पढ़े गे । सत्र दी प्रधानता प्रो.वीणा गुप्ता ते प्रो. शशि पठानिया होरें कीती जेह्ड़ियां जम्मू यूनिवर्सिटी दे डोगरी विभाग दियां अध्यक्षा रेही चुकी दियां न। इस सत्र च गद्य साहित्य दे बक्ख-बक्ख रूपें–डोगरी दे विचारात्मक निबंधें, ललित निबंधें ते आत्मकथाएं पर शोध-पत्र पढ़े गे । पत्र-वाचक हे- डॉ. बंसी लाल शर्मा, डॉ. जोगिंदर सिंह ते डॉ. संदीप दुबे । डॉ. रितु कुमार कुसै कारण पुज्जी नेईं सके। शोध-पत्रें पर खु’ल्लिया चर्चा ते विचार-बटांदरा होआ।
डॉ. हाजिनी होरें अपने प्रधानगी भाशन च इस चाल्ली दे विशे उप्पर सैमीनार करोआने लेई डोगरी संस्था दी सराह्ना कीती ते आखेआ जे इस चाल्ली दे विशे उप्पर सैमीनार करोआना बड़ा ज़रूरी ऐ ते निबंध विधा पर एह् पैह्लली बारी होआ करदा ऐ। निबंध इक नेही विधा ऐ जिस थमां कुसै बी भाशा च लखोने आह्ले साहित्य दी परिपक्वता दा पता लगदा ऐ। उ’नें आखेआ एह् डोगरी साहित्य दे पच्हत्तरें ब’रें दी मेह्नत दा नतीजा ऐ जेह्ड़ा लगातार साहित्य लखोआ दा ऐ ते हून एह् स्हेई मौक़ा ऐ जे इस विधा पर आलोचनात्मक नज़र रक्खी जाऽ।
दर्शन दर्शी होरें उ’नें साधक साहित्यकारें गी याद कीता जि’नें शुरुआती दौर च इस विधा पर लिखेआ हा जि’यां-प्रो. राम नाथ शास्त्री, प्रो. लक्ष्मी नारायण, कर्नल शिव नाथ, विश्व नाथ खजूरिया आदि। इ’नें साहित्यकारें इस विधा दी शैल मजबूत नीह् रक्खी दी ऐ जिसी अग्गै बधाया जाईं सकदा ऐ। उ’नें आखेआ जे बड़े लेखकें इस विधा च अपना जोगदान दित्ता ऐ, पर अजें मता करने दी लोड़ ऐ। उ’नें मींद जताई जे एह् सैमीनार लेखकें गी इस विधा च लिखने लेई प्रेरत करी सकदा ऐ।
इस थमां पैह्ले संस्था दे प्रधान प्रो. ललित मगोत्रा होरें आए दे परौह्नें दा सोआगत करदे होई आखेआ जे डोगरी साहित्य निबंध लेखन बाकी विधाएं दे मकाबले च घट्ट लखोआ ऐ। कुल मलाइयै साहित्य दे बाद्धे-विकास आस्तै साहित्य दी सभनें विधाएं आह्ली बक्खी ध्यान देने दी ज़रूरत ऐ। उ’नें इ’ब्बी आखेआ जे डोगरी संस्था समें-समें पर इस विधा पर लिखने लेई प्रोत्साहत करदी ऐ। उ’नें आखेआ जे इस्सै लेई नौजुआनें गी इस विधा च लिखने लेई प्रेरत करने आस्तै संस्था ने नौजोआन शोध छात्रें गी पत्र वाचन दा जिम्मा दित्ता ऐ।
उद्धाटन सत्र दा सफल संचालन डोगरी संस्था दे महामंत्री डॉ. निर्मल विनोद ते धन्नवाद संस्था दे उप प्रधान ज्ञानेश्वर शर्मा होरें कीता।
