डोगरी संस्था जम्मू आसेआ अज्ज पंद्ररा रोजा गोश्ठी दा अजोजन कीता गेआ।अज्जै दी गोश्ठी दी चेचगी ही गोश्ठी दे चेचे परौह्ने पर्वतारोही ले. कर्नल रणवीर सिंह जम्वाल जि’नें माउंट एवरेस्ट गी त्रै बारी फतेह् करियै, अपने देशै दा ते डुग्गर प्रदेश दा नांऽ रोशन कीता ऐ।गोश्ठी दी प्रधानता संस्था दे प्रधान प्रो. ललित मगोत्रा होरें कीती। इस च बक्ख-बक्ख भाशाएं दे कवि, साहित्यकार कलाकार ते वाइस अॉफ डोगरा टीम दे सदस्ये शामल हे।गोश्ठी च अब्दुल कुंडरिया, श्याम बिहारी, डॉ़ चंचल भसीन, प्रेमिला मन्हास, विजया ठाकुर, रत्न भारद्वाज, के. के. शाकिर, शाम तालिब, शकुंत दीपमाला, डॉ. निर्मल विनोद, ज्ञानेश्वर शर्मा, सुशील वेगाना, प्रो. ललित मगोत्रा ते पवन वर्मा होरें कवितां पढ़ियाँ जि’नेंगी श्रोताएं बड़ा पसिंद कीता।
कविता पाठ दे मगरा दूए दौर च अज्जै दे चेचे परौह्ने पर्वतारोही ले. कर्नल रणवीर सिंह जम्वाल हुंदे व्यक्तित्व ते कृतित्व बारै श्री राम खजूरिया होरें अपने वचार व्यक्त कीते।जम्वाल हुंदा व्यक्तित्व नौजुवान पीढ़ी लेई प्रेरणा देने आह्ला ऐ। जम्वाल होरें अपने भाशन च बोलदे होई डोगरी संस्था दा शुक्रिया अदा कीता। ते कन्नै इब्बी उमींद ज़ाहर कीती जे जिसलै बी उ’नेंगी जम्मू औने दा मौक़ा मिलग तां ओह् डोगरी संस्था दी गोश्ठियें च ज़रूर शामल होंगन।डोगरी संस्था दे प्रधान प्रो. ललित मगोत्रा होरें अज्जै दी गोश्ठी बारै गल्लबात क़रदे होई आक्खेआ जे अज्ज दी गोश्ठी बेहतरीन गोश्ठी ही। ते डोगरी कविता उच्च स्तर दी ते हर विशे उप्पर लिखी जा दी।जेह्ड़ी दूई भाषाएँ दा मुक़ाबला करदी ऐ।ते प्रधान होरें आए दे मेहमानें दा धन्नयवाद बी कीता। कार्यक्रम दा सफल संचालन डोगरी संस्था दे साहित्य मंत्री सुशील बेगाना होरें कीता।
