प्यारे साथियो,
जि’यां के तुस सब जानदे ओ जे अस कोरोना वायरस दे बड़े गै मुशकल दौर चा गुजरा करने आं, बेशक डोगरी संस्था दियां पंदरा-रोजा गोश्ठियां ते कताबें दे प्रकाशन दा कम्म अपने नियमत ढंगै कन्नै चला करदे न पर इस अजीबो-गरीब विश्व-व्यापी महामारी ने संस्था दी उ‘नें गतिविधियें ते कम्में गी बड़ा प्रभावत कीता ऐ, जिं’दे च लेखकें ते जनता दे जुड़ी कट्ठे बौह्ने दी लोड़ होंदी ऐ। पिछले 8-9एं म्हीनें थमां अस संस्था दे सदस्य बी निं मिली सके ।
में सभनें सदस्यें दी जानकारी आस्तै दस्सना चाह्न्नां जे इ’नें सभनें औखियें परिस्थितियें दे बावजूद बी अस डोगरी भवन-निर्माण दे बाकी बचे दे ते मते हारे अद्धे-अधूरे पेदे किश कम्में गी पूरा करी सके आं ते निर्माण दा कम्म इसलै बी चला करदा ऐ । जेह्ड़े कम्म पिछले 8-9एं म्हीनें दे अरसे च पूरे कीते जाई सके न, संस्था दे मानजोग सदस्यें दी जानकारी आस्तै उं’दी तफसील इस चाल्ली ऐ:
- हाल दे फर्श पर टाइलां लुआने दा कम्म
- कारीडोर दे फर्श पर टाइलां लुआने दा कम्म
- हाल दी स्टेज उप्पर लक्कड़ी दे फर्श दा कम्म
( तुं’दी जानकारी आस्तै इ’नें कम्में दे किश फोटो बी दित्ते जा करदे न ।)
कॉरीडोर हाल ते स्टेज हाल ते स्टेज
इत्थै इस गल्ला दा जिकर करना बड़ा गै जरूरी ऐ जे एह् सारा कम्म यूनिवर्सिटी, कालजें ते हायर सैकंडरी स्कूलें च लग्गे नौजोआन अध्यापकें, संस्था दे किश मैंबरें-शुभचिंतकें आसेआ माल्ली-मदाद देने दे भरोसे कन्नै शुरू ते पूरा करना मुमकन होई सकेआ ऐ । अस उं’दे आभारी आं । इसले तगर जिं’दे कोला माल्ली-मदाद मिली चुकी ऐ उं’दे नांs इत्थै दिंदे असेंगी बड़ा गौह् मसूस होआ दा ऐ, ओह् न:
- डॉ. संदीप दुबे ‘सूफी’ (₹50000/-)
- डॉ. राजेश मन्हास (₹50000/-)
- डॉ. अंजु रानी (₹40000/-)
- डॉ. उषा रानी (₹30000/-)
- डॉ. वैष्णो देवी (₹20000/-)
- श्रीमती मीना कुमारी(₹30000/-)
- हायर सैकंडरी लैक्चरर (₹50000/-)
- श्रीमती सुनीता भडवाल (₹50000/-)
- श्रीमती सुमन पाल (₹25000/-
- श्रीमती संतोष सांगड़ा (₹50000/-)
- डोगरी संस्था दे औह्देदार (₹75000/-)
मानजोग सदस्यें दी जानकारी आस्तै अग्गें बी दस्सी देचै जे गेट कोला लेइयै हाल तगर, बाह्रले थढ़े उप्पर, भवन दे त्रौनें पास्सैं दे कॉरीडोर च टाइल आह्ला फर्श पाने दी बड़ी लोड़ ही, जेह्ड़ा खासा खर्चे आह्ला कम्म हा । इसदे आस्तै असें स्थानी कार्पोरेटर, श्री सुनीत कुमार रैणा हुंदी मारफत प्रोजैक्ट दा प्रस्ताव म्यूनिसपल कार्पोरेशन, जम्मू गी दित्ता । म्यूनिसपल कार्पोरेशन कोला इसदी मंजूरी थ्होई गेई ही । इसलै एह् कम्म चला करदा ऐ ते तौले गै पूरा बी होई जाह्ग ।
( चला करदे कम्मै दे किश फोटो बी दित्ते जा करदे न ।)
भवन दी परदक्खन थढ़े दे अग्गें गेट थमां भवन तगर
इसदे आस्तै अस खास करियै म्यूनिसपैलटी दे ऐक्ज़ीक्यूटिव इंजीनियर, श्री सुनील शर्मा, जेह्ड़े डोगरी संस्था दे मानजोग सदस्य बी हैन, ते बाकी इंजीनियरिङ स्टाफ, जि’नें इस मामले च साढ़ी मदद कीती, उ’नें सभनें दे आभारी आं ।
जेह्ड़े कम्म अजें पूरे होने बाकी न, उं’दे च मुक्ख-मुक्ख न:
हाल च साउंड सिस्टम ते लाइट-सिस्टम लुआने, एअर कंडीशीनिङ ते कुर्सियां लुआने दे कम्म बगैरा।
हुन साढ़ी कोशश इ’नें कम्में गी पूरा करने बक्खी रौह्ग ।
पैह्लें साहीं तुसें सभनें दे साथ-सैह्जोग दी मेदा च तुं’दी तंदुरुस्ती दियें शुभकामनाएं कन्नै,
तुं’दा अपना,
ललित मगोत्रा