डोगरी संस्था जम्मू आसेआ कल्ल श्रीमती चंचल नरेंद्र भसीन हुंदे बाल क्हानी संग्रैह् “नानी सुनाओ क्हानी” दा विमोचन डोगरी भवन कर्ण नगर जम्मू च कीता गेआ। डॉ. अरविंदर सिंह ‘अमन’ अतिरिक्त-सचिव (जम्मू-कश्मीर आर्ट कल्चर एण्ड लैंग्वेजज ) इस कार्यक्रम दे मुक्ख परौह्ने हे, कार्यक्रम दी प्रधानता डोगरी संस्था दे प्रधान प्रो. ललित मगोत्रा होरें कीती ते प्रो. वीणा गुप्ता ते श्री छत्रपाल होर चेचे परौह्ने हे।
कार्यक्रम दी चेचगी एह् रेही जे डोगरी दे मन्ने परमन्ने दे साहित्यकार वेदराही होरें कार्यक्रम च चानक आइयै कार्यक्रम दी रौनक़ बदाई दित्ती। वेदराही होरें बोलते होई आखेआ जे ओह् बड़े ख़ुश न जे डोगरी च लगातार हर विधा च कताबां प्रकाशत होआ दियां न। हर चाल्ली दा साहित्य रचेआ जा दा ऐ। कार्यक्रम दे मुख्य परौह्ने डॉ. अरविंदर सिंह ‘अमन’ होरें बोलदे होई आखेआ जे बाल साहित्य कन्नै गै ञ्यानें गी उं’दी मातृ-भाशा कन्नै जोड़ना संभव होई सकदा ऐ। डोगरा लोक संस्कृति बड़ी समृद्ध ऐ, अकादमी बी अपने कार्यक्रमें ते स्कीमें राहें लोक संस्कृति गी बढ़ावा देआ दी ऐ।
प्रो. ललित मगोत्रा संस्था दे प्रधान होरें लेखिका दी मबारख दिंदे होई आखेआ जे इस कताबै दे औने कन्नै डोगरी साहित्य च बाद्धा होआ ऐ ख़ास करी बाल साहित्य च। उ’नें आखेआ जे डोगरी संस्था हर इक प्रयास करै दी ऐ जे संस्था इक साहित्यक ते सांस्कृतिक केंदर बनै। उ’नें आए दे लोकें गी इक सूचना बी दिती जे जेह्ड़ा डोगरी भवन दे हाल दा कम्म किश कारणें मूजब बंद हा दोबारा शुरू होई गेआ ऐ।
प्रो. वीणा गुप्ता ते श्री छत्रपाल होरें बी कताबै बारें अपने विचार प्रकट कीते। इस समारोह च मती गिनतरी च बक्ख-बक्ख भाशा दे लखारियें, साहित्यकारें, प्रैस, मीडिया, थिएटर, रेडियो, टैलिविज़न कन्नै जुड़े दे कलाकारें हिस्सा लैता।
कार्यक्रम च आए दे मेह्मानें दा सुआगत डोगरी संस्था दे उप-प्रधान श्री ज्ञानेश्वर शर्मा होरें ते कार्यक्रम दा सफल संचालन संस्था दे साहित्य मंत्री श्री सुशील बेगाना होरें कीता।
