डोगरी संस्था जम्मू आसेआ वरिश्ठ कवि ते साहित्य अकादमी पुरस्कार विजेता श्री ज्ञानेश्वर शर्मा हुंदे बाल क्हानी-संग्रैह् ‘सत्त क्हानियां’ दा विमोचन सोमवार (29.10.18) डोगरी भवन, कर्ण नगर जम्मू च कीता गेआ। इस कार्यक्रम दे चेचे परौह्ने साबका कैबिनट मंत्री श्री शाम लाल शर्मा होर हे ते कार्यक्रम दी प्रधानता डोगरी संस्था दे प्रधान प्रो. ललित मगोत्रा होरें कीती। कार्यक्रम च बक्ख-बक्ख भाशाएं दे लेखक, शोध छात्र, ते मन्ने-परमन्ने दे शैह्री खासी गिनतरी च शामल हे।
इस मौके पर साबका कैबिनट मंत्री शाम लाल शर्मा होरें बोलदे होई आखेआ जे एह् बड़ी ख़ुशी आह्ली गल्ल ऐ जे ज्ञानेश्वर शर्मा हुंदे जनेह् वरिश्ठ लखारी अज्जै दे दौर दियें चुनौतियें गी स्वीकारदे होई ञ्यानें आस्तै साहित्य लिखा दे न, जेह्ड़े बड़ी तेजी कन्नै अपनी मातृ-भाशा ते संस्कृति थमां दूर होंदे जा दे न। उ’नें आखेआ जे अपनी सांस्कृतिक बरासत ते साहित्य दी सांभ-संभाल करने, उस्सी बढ़ावा देने ते नौजुआनें च गौह् दा जज्बा पैदा करने दा इस थमां बेहतर होर कोई रस्ता नेईं ऐ। उ’नें डोगरी संस्था दे कम्में दी बी सराहना कीती जेह्ड़ी लगातार 75एं ब’रें थमां कम्म करदी आवै दी ऐ।
प्रो. ललित मगोत्रा होरें अपने अध्यक्षी भाशान च लेखक गी मुबारख दिंदे होई मीद जताई जे युवा पाठकें च एह् कताब खासी पसिंद कीती जाह्ग। उ’नें आखेआ जे राज्य सरकार डोगरी दे नांऽ पर डोगरें कन्नै बेन्याई करदी ऐ, शिक्षा दे खेतरै च बी सरकार डोगरी दी बढ़ावा देने दे अपने वायदे च नाकाम रेही ऐ, कोई बी ऐसी ठोस गैं नेईं पुट्टी गेई जे डोगरी गी प्राइमरी स्तर पर स्कूलें च लागू कीती जा।
डॉ. अशोक खजूरिया होरें कताब पर आलोचनात्मक पत्र पढ़ेआ। कुमारी वृंदा ने इक पाठक दे तौर पर अपने विचार बी सांझे कीते ज्ञानेश्वर शर्मा होरें डोगरी भाशा गी नमीं पीढ़ी च लोकप्रिय बनाने दे किश सुझाऽ सुझाए जे मश्हूर टैलिविजन ऐनीमेशन सीरियलें गी डोगरी च डब कीता जाऽ, साहित्य अकादमी दी तर्ज पर कल्चरल अकैडमी आसेआ बाल-साहित्य लेई पुरस्कार, ते राज्य अकादमी आसेआ सलाना बाल-नाटक मुकाबलें दा सरिस्ता कीता जाऽ। कार्यक्रम दा सफल संचालन संस्था दे महामंत्री डॉ. निर्मल विनोद होरें कीता।
