डोगरी संस्था, जम्मू दे औह्देदारें दी बैठक कल डोगरी भवन, कर्ण नगर जम्मू च होई। बैठक दा मूल मक़सद संस्था दे कार्यक्रमें दा जायज़ा लैना ते कन्नै औने आह्ले समें च संस्था आसेआ करोआए जाने आह्ले कार्यक्रमें आस्तै दिन-तरीकां निश्चत करना हा। संस्था दे प्रधान प्रो. ललित मगोत्रा होरें पैह्लें संस्था दे नियमत कार्यक्रमें दा ब्यौरा दित्ता ते फ्ही औह्देदारें कन्नै सलाह्-मशवरे बाद जेह्ड़े कार्यक्रम करने दा फ़ैसला कीता गेआ ते जि’नें कार्यक्रमें दियां दिन-तरीकां निश्चत कीतियां गेइयां, उं’दी तफ़सील इस चाल्ली ऐ:
1. इक मलाटी दे तैह्त इक ख़ास शख़्सियत कन्नै मुलाकात,
2. पुस्तक विमोचन समारोह्—श्रीमती चंचल नरेंद्र भसीन हुंदी पुस्तक दा विमोचन 24.10.18 गी ते श्री ज्ञानेश्वर शर्मा हु्ंदी पुस्तक दा विमोचन 29.10.18 गी,
3. सैमिनार- 2 दिसंबर 2018 गी,
4. जम्मू थमां बाह्र जाइयै साहित्यक कार्यक्रम
5. डोगरी मानता-दिन समारोह्
6. संगीत-कार्यक्रम आदि।
बैठक च डोगरी संस्था दी वैब साइट दे कम्मै बारै प्रो. शशि पठानिया होरें औह्देदारें गी दस्सेआ जे एह् कम्म तक़रीबन-तक़रीबन पूरा होई चुके दा ऐ । इस जानकारी दे बाद फैसला कीता गेआ जे तौले गै विमोचन करियै संस्था दी वैब साइट दा लोकार्पण करी दित्ता जाह्ग ।
इस बैठक च प्रो. वीणा गुप्ता, प्रो. शशि पठानिया, श्री ज्ञानेश्वर शर्मा, डॉ. निर्मल विनोद, श्री मदन पाधा, श्रीमती विजया ठाकुर, डॉ. चंचल भसीन, डॉ. अशोक खजूरिया, श्री सुशील बेगाना ते श्री इंद्र जीत केसर होरें हिस्सा लैता।
