बुद्धबार (05.12.18) गी ‘सन्दरानी साहित्यिक एवं सांस्कृतिक उत्सव’ दा अयोजन डोगरी संस्था, जम्मू, (रजि.) ग्राम पंचायत सन्दरानी ते जम्मू कल्चरल फोरम (रजि.) दे सांझे प्रयासें कन्नै सन्दरानी ग्रां च (उधमपुर) कीता गेआ। इस कार्यक्रम च बक्ख-बक्ख भाषाएं दे कवियें, गायकें, कलाकारें हिस्सा लैता जेह्ड़े जम्मू, उधमपुर, रियासी, कटरा, सन्दरानी ग्रां दे बक्ख-बक्ख हिस्सें थमां आए दे हे। कार्यक्रम च कुंजी भाशान आदरजोग श्री अशोक अंगुराना (आई. ए. एस.) होरें ते आए दे मैह्मानें दा सुआगत जम्मू कल्चरल फोरम (रजि.) दे उप-प्रधान डॉ. दुष्यंत कुमार होरें कीता। कार्यक्रम दे मुक्ख परौह्ने पंजाबी दे मन्ने परमन्ने दे कवि सुरिंदर सीरत, चेचे परौह्ने पंजाबी दे प्रसिद्ध क्हानीकार खालिद हुसैन होर हे, ते कार्यक्रम दी प्रधानता डोगरी संस्था, जम्मू दे प्रधान प्रो. ललित मगोत्रा होरें कीती।
कार्यक्रम दी चेचगी एह् रेही जे इस च सन्दरानी ग्रां दे लोकें दी बी पूरी-पूरी हिस्सेदारी रेही भामें गल्ल कविता दी ऐ जां संगीत दी। उ’नें अपनी कला दा प्रदर्शन बखूबी कन्नै कीता। इस कार्यक्रम च जि’नें कवियें हिस्सा लैता ओह् न- चन्ने राम, मोहन लाल, मोहन लाल शर्मा, प्यासा अंजुम, ललित शर्मा, तारा चंद कलान्दरी, रणधीर सिंह रायपुरिया, कुसुम शर्मा अंतरा, दीपक आरसी, सुशील बेगाना, डॉ. चंचल भसीन, प्रो. शशि पठानिया, प्रो. सुरिंदर सीरत, बृज मोहन, अशोक अंगुराना, ज्ञानेश्वर शर्मा, प्रो. ललित मगोत्रा आदि। जम्मू दे मन्ने परमन्ने दे संगीतकार शाम साजन ते पृथ्वी राज शर्मा हुन्दी बनाई दी धुनें उप्पर, गायकें गीत गाइयै लोकें दी वाह-वाही लुट्टी।
गायक हे- सतवीर जम्वाल, गुरशरन कौर, मंजू डोगरा, मुक्ति ओबरॉय, कांता शर्मा, अंजना खजुरिया, चंदर मोहन ते शाम साजन होर। रघुराज सिंह नै ग़ज़ल ते धरमू राम, कमला देवी ते गीता देवी होरें अपने-अपने साथियें कन्नै मिलियै डोगरी भाखां गाइयां। कार्यक्रम च मती गिन्तरी च लोक शामल होए। एह् अपनी चाल्ली दा बक्खरा कार्यक्रम हा जेह्ड़ा मानजोग अशोक अंगुराना हुंदे जत्नें करी पूरा होई सकेआ ऐ।
कार्यक्रम दा सफल संचालन रविंदर कौल होरें ते धन्नवाद ग्रां सन्दरानी दे सरपंच पवन कुमार होरें कीता।
