कल (25-11-18) डोगरी संस्था, जम्मू ते डोगरी कला टीम कठुआ दे सांझे प्रयासें कन्नै डुग्गर दे लोक नायक बाबा जित्तो दी याद च इक मुशायरे दा अयोजन कठुआ च कीता गेआ। मुशायरे थमां पैह्ले डोगरी कला टीम दे कलाकारें नशाखोरी, शोशण, छूआछूत जनेही कबैह्तें बारै नाटक ‘बंद कर इस्सी’ दे जरिए लोकें गी जागरूक कीता। नाटक दे द’ऊं कलाकारें धीरज कुमार ते श्रीमती मोनिका कुमारी ने बक्ख-बक्ख किरदारें दियां भूमिकां बड़ी सफलता कन्नै नभाइयां।
राजेश कोहली होरें दीनू भाई पन्त हुंदी कविता सस्वर गाई। मुशायरे च जम्मू ते कठुआ दे शायरें हिस्सा लैता जिं’दे च श्री संजय सहगल, श्री तारा चंद कलंदरी, श्री रणधीर सिंह रायपुरिया, डॉ. चंचल भसीन, प्रो. शशि पठानिया, श्री ज्ञानेश्वर शर्मा, श्री दीपक आरसी, श्री अशोक अम्बर, श्री कुलदीप किप्पी, श्री सुशील बेगाना, डॉ. निर्मल विनोद ते प्रो. ललित मगोत्रा होर शामल हे।
मुशायरे दी प्रधानता डोगरी संस्था दे प्रधान प्रो. ललित मगोत्रा होरें कीती ते संचालन डोगरी संस्था दे साहित्य मंत्री सुशील बेगाना होरें कीता। कार्यक्रम च आए दे परौह्नें दा सुआगत ते धन्नवाद डोगरी कला टीम, कठुआ दे संजोजक श्री धीरज कुमार होरें कीता।
